ގދ. މަޑަވެލި އަކީ، ހުވަދުއަތޮޅު ދުކުނުބުރީ ރަށްތަކުގެ ތެރެއިން އާބާދީ ގޮތުން 3 ވަނަ އަށް އެންމެ ބޮޑު އެއްރަށެވެ. ގދ. މަޑަވެލި އަށް ދެވިފައިވާ އިގިރޭސި އަކުރަކީ Q1 އަދި ދިވެހި އަކުރަކީ (ގދ) އެވެ. ޖޯރޤްރަފީ ގޮތުން ރަށް އުފެދިފައި އޮންނަނީ 3°15′N 73°00′E / 3.250°N 73.000°E   ޞަރަޙައްދުގައެވެ. މާލެއާ 48 ނޮޓިކަލް މޭލް ދުރުގައި އޮންނަ މި ރަށަކީ  ކާޑެއްދޫ ކަޑުން ފެށިގެން ފިޔޯރީ ކަނޑާ ހަމައަށް ގިނަ ޢަދަދެއްގެ ރަށްތަކެއްގެ މައްޗަށް އެކުލެވޭ ރާއްޖޭގައި އޮތް އެންމެ ދިގުފަރުގެ އުތުރުކޮޅުން ކާޑެއްދޫ ކަނޑުގެ ކަނޑުއޮޅީގައި މައިކަނޑާއި ގުޅިފައިވާ މައިފަރުގެ ރަށެކެވެ.  މިރަށަކީ ކާޑެއްދޫ އެއަރޕޯޓާއި އެންމެ ކައިރީގައި އޮތް މީހުން ދިރިއުޅޭ ރަށެވެ.  ރަށުގެ ބޮޑުމިނަކީ 49.8 ހެކްޓަރއެވެ. 2023 ނިމިގެން ދިޔައިރު މިހާރު ރަށުގެ އާބާދީއަކީ 2062 މީހުންނެވެ. 1071 ފިރިހެނުންނާއި 991 އަންހެނުން ދިރިއުޅެމުންދާ މިރަށުގެ ރައްޔިތުންނަކީ ހުނަރުވެރި މަސައްކަތްތެރިން ދިރިއުޅޭ ރަށަކަށްވާތީ ރަށް ތަރައްޤީކޮށް ކުރިއެރުވުމަށްޓަކައި އާމުދަނީ ހޯދުމަށް ފަތުރުވެރިކަމުގެ މަސައްކަތާއި، މަސްވެރިކަން ކުރުމާއި، ކޮންސްޓްރަކްޝަން މަސައްކަތް ކުރެއެވެ. މިރަށަކީ ޒަމާނުއްސުރެ ރަށްގިރުމާއި އުދައެރުންފަދަ ތިމާވެށީގެ ގޮތުން ނުހަނު ނާޒުކު ޙާލަތެއްގައިވާ، ބިންތިރި އާބާދީ ތޮއްޖެހި ރަށުގެ ފެންފަށަލަ ތަޣައްޔަރުވެފައިވާ ތިމާވެށީގެ ނާޒުކު ރަށެކެވެ. 

ގދ. މަޑަވެލީގެ ރައްޔިތުންނަށް ޚިދުމަތްދިނުމަށްޓަކައި ސަރުކާރުގެ ބައެއް މުޙިއްމު ޚިދުމަތްދޭ މުއައްސަސާތައް މިރަށުގައި ޤާއިމު ކުރެވިފައިވެއެވެ. އެގޮތުން ގދ. މަޑަވެލި ޞިއްޙީ މަރުކަޒާއި، މޯލްޑިވްސް ޕޮލިސް ސާރވިސްގެ ޚިދުމަތް ، ގްރޭޑް 10 އަކާއި ހަމަށް ކިޔަވާދޭ މަޑަވެލީ ސްކޫލްގެ ޚިދުމަތާއި، ލުއި ފަސޭހަ ގޮތުގައި ޚިދުމަތްދޭ ފެނަކަ ކަރަންޓްގެ ޚިދުމަތް ހިމެނޭއިރު ޝަރުޢީ ނިޒާމްގެ ޚިދުމަތް ދިނުމަށް މެޖިސްޓްރޭޓް ކޯޓެއް ޤާއިމު ކުރެވިފައިވެއެވެ. އަދި މީގެ އިތުރުން އެސްޓީއޯ ބޭސް ފިހާރައެއް ޤާއިމް ކުރެވިފައިވެއެވެ.

2023 ވަނަ އަހަރު ކައުންސިލްގެ އިދާރާއަށް ލަފާކުރާ ޖުމްލަ ބަޖެޓަކީ 12,226,853.59ރ (ބާރަ މިލިއަން ދެލައްކަ ސައްބީސް ހާސް އަށް ސަތޭކަ ފަންސާސް ތިން ރުފިޔާ ފަންސާސް ނުވަ ލާރި) ކަމަށާއި އަދި 2023 ވަނަ އަހަރު ކައުންސިލުގެ އާމްދަނީގެ ގޮތުގައި ލިބޭނެކަމަށް ލަފާކުރާ ޖުމްލަ ބަޖެޓަކީ 12,870,372.33ރ (ބާރަ މިލިއަން އަށް ލައްކަ ހަތްދިހަ ހާސް ތިންސަތޭކަ ހަތްދިހަ ދެރުފިޔާ ތެއްތިރީސް ލާރި) ކަމަށާއި، އަދި ރިޒާވްގެ ގޮތުގައި މަދުވެގެން ޖުމްލަ އާމްދަނީގެ 5% (ފަހެއް އިންސައްތަ) އަށްވާ 643,518.62ރ (ހަލައްކަ ސާޅިސް ތިންހާސް ފަސްސަތޭކަ އަށާރަ ރުފިޔާ ފަސްދޮޅަސް ދެލާރި) ކަނޑައެޅުމަށް ނިންމައި 2023 ވަނަ އަހަރުގެ މަޑަވެލި ކައުންސިލްގެ ބަޖެޓް ފާސްކުރުމަށް، 04 ޖަނަވަރީ 2023 ވަނަ ދުވަހު ބޭއްވުނު ކައުންސިލްގެ ހަތަރު ވަނަ ދައުރުގެ 2023 ވަނަ އަހަރުގެ 01 ވަނަ އާންމު ބައްދަލުވުމަށް ޙާޟިރުވި ކައުންސިލަރުންގެ އިއްތިފާޤުން ނިންމާ ފާސްކޮށްފީމެވެ.